អូស្ត្រាលីពង្រីកលទ្ធភាពទទួលបានទឹកស្អាតនៅតំបន់ជនបទក្នុងខេត្តកំពង់ឆ្នាំង

អូស្ត្រាលីបានសហការជាមួយកម្ពុជាអស់រយៈពេលជាងមួយទសវត្សរ៍ ដើម្បីពង្រឹងលទ្ធភាពទទួលបានទឹកស្អាតប្រើប្រាស់។ តាមរយៈគម្រោងចំនួន ៩០ នៅទូទាំងខេត្តចំនួន ១៦ ការគាំទ្ររបស់អូស្ត្រាលីបានជួយនាំយកទឹកស្អាត សុវត្ថិភាព ដល់ប្រជាជនកម្ពុជាជាង ១,២ លាននាក់ នៅក្នុងសហគមន៍ជនបទ។ 

ក្នុងនោះរួមមានឃុំកំពង់អូស ដែលអូស្ត្រាលីបានធ្វើការជាមួយនឹងប្រតិបត្តិការទឹកឯកជនមួយ ដើម្បីផ្គត់ផ្គង់ទឹកស្អាតដល់ប្រជាពលរដ្ឋជាង ៩០០ គ្រួសារ។

អូស្ត្រាលីប្តេជ្ញាគាំទ្រដល់គោលដៅរបស់កម្ពុជា ក្នុងការទទួលបានទឹកស្អាតប្រកបដោយសុវត្ថិភាពជាសកលនៅឆ្នាំ ២០៣០ ដើម្បីលើកកម្ពស់សុខភាពសាធារណៈ បង្កើនភាពធន់នឹងការប្រែប្រួលអាកាសធាតុ និងពង្រីកកាលានុវត្តភាពសេដ្ឋកិច្ច។