អូស្ត្រាលីបានជួយប្រជាជនជាង ១.២ លាននាក់ នៅតាមជនបទក្នុងប្រទេសកម្ពុជា ឱ្យទទួលបានទឹកស្អាតប្រើប្រាស់។ យើងប្តេជ្ញាបន្តជួយដល់ប្រទេសកម្ពុជា ដើម្បីសម្រេចបាននូវលទ្ធភាពទទួលបានទឹកស្អាតជាសកលនៅឆ្នាំ ២០៣០។  

នៅក្នុងស្រុកសំបូរ ខេត្តកំពង់ធំ ប្រជាពលរដ្ឋជាង ២៤,៣០០ នាក់ បច្ចុប្បន្នអាចទទួលបានទឹកស្អាតប្រើប្រាស់ដោយសុវត្ថិភាព ដោយសារការគាំទ្រពីរដ្ឋាភិបាលអូស្ត្រាលី តាមរយៈកម្មវិធី CAPRED ដល់ប្រតិបត្តិករទឹកស្អាតឯកជនក្នុងស្រុក។  

សម្រាប់អ្នកកាន់ប័ណ្ណក្រីក្រ លោកស្រី កា ហ៊ុយ ការទទួលបានទឹកស្អាតប្រើប្រាស់នេះ បានជួយផ្លាស់ប្តូរជីវីតលោកស្រីយ៉ាងខ្លាំង។ វាបានជួយសម្រាលបន្ទុកប្រចាំថ្ងៃក្នុងការដឹកទឹក ជួយគាត់ពីកង្វះខាតទឹកក្នុងរដូវប្រាំង ហើយធានាឱ្យមានទឹកស្អាតសម្រាប់ប្រើប្រាស់ប្រចាំថ្ងៃ។  

🎥  សូមទស្សនារឿងរ៉ាវរបស់ លោកស្រី កា ហ៊ុយ ហើយមើលពីរបៀបដែលទឹកស្អាតកំពុងជួយផ្លាស់ប្តូរជីវិតរបស់ប្រជាពលរដ្ឋនៅទូទាំងប្រទេសកម្ពុជា។

្នុងទិវាពិភពលោកគ្រាសធុនមីក្រូ តូច និងមធ្យម (MSME) អូស្ត្រាលីអបអរសាទរភាពធន់ និងនវានុវត្តន៍របស់សហគ្រាសធុនមីក្រូ តូច និងមធ្យម នៅកម្ពុជា។

នៅប្រទេសកម្ពុជា អាជីវកម្មខ្នាតតូចបានជំរុញសេដ្ឋកិច្ចជាតិ ដោយរួមចំណែក ៩០ ភាគរយនៃអាជីវកម្មទាំងអស់ ជំរុញពីរភាគបីនៃផលិតផលក្នុងស្រុកសរុប (GDP) និងផ្តល់ការងារដល់ ៧០ ភាគរយនៃកម្លាំងពលកម្មសរុបនៅកម្ពុជា។

តាមរយៈកម្មវិធី CNai Accelerator រដ្ឋាភិបាលអូស្ត្រាលីកំពុងគាំទ្រសហគ្រាសចាប់ផ្តើមអាជីវកម្មថ្មីៗ ដូចជា Cam Agro ជាមួយនឹងការបណ្តុះបណ្តាលអាជីវកម្ម និងមូលនិធិចាប់ផ្តើមអាជីវកម្ម។ ក្រុមហ៊ុន Cam Agro សហការជាមួយកសិករខ្នាតតូច ដោយទទួលទិញផលិតផលកសិកម្មពីពលរដ្ឋយ៉ាងទៀតទាត់ និងផ្តល់តម្លៃសមរម្យលើរាល់ការបញ្ជាទិញ។ ការណ៍នេះ ជួយដល់គ្រួសារដូចជាគ្រួសារលោកស្រី គង់ នៀម ឱ្យមានប្រាក់ចំណូលមានស្ថិរភាព និងអាចឱ្យកូនៗរបស់ពួកគេបានបន្តទៅសាលារៀន។

អូស្ត្រាលីមានមោទនភាពដែលបានគាំទ្រសហគ្រាសធុនមីក្រូ តូច និងមធ្យម នៅកម្ពុជា ក្នុងខណៈដែលអាជីវកម្មទាំងនោះ កំពុងតែកសាងអនាគតដ៏ភ្លឺស្វាងជាងមុននៅទូទាំងប្រទេស។  🌱

🎥 សូមទស្សនាវីដេអូដើម្បីស្វែងយល់បន្ថែមអំពីកម្មវិធីនេះ។ 

អូស្ត្រាលី បានរៀបចំកិច្ចសន្ទនាថ្នាក់ខ្ពស់ ស្ដីអំពី អនាគតសេដ្ឋកិច្ចកម្ពុជា 

តាមរយៈកម្មវិធីភាពជាដៃគូកម្ពុជា អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED) អូស្ត្រាលីបានរៀបចំកិច្ចសន្ទនាស្តីពីគោលនយោបាយ កម្រិតខ្ពស់ ស្តីពីកំណើន និងពិពិធកម្មសេដ្ឋកិច្ចរបស់កម្ពុជា។ កម្មវិធីនេះ មានវត្តមានវាគ្មិនសំខាន់ គឺលោកសាស្ត្រាចារ្យ Ricardo Hausmann មកពីសាកលវិទ្យាល័យ Harvard ព្រមទាំងមន្ត្រីជាន់ខ្ពស់កម្ពុជា ដៃគូអភិវឌ្ឍន៍ និងថ្នាក់ដឹកនាំវិស័យឯកជន ដើម្បីស្វែងយល់ពីមាគ៌ាសម្រាប់កំណើនប្រកបដោយចីរភាព បរិយាបន្ន និងពិពិធកម្ម។

នៅក្នុងកិច្ចសន្ទនារយៈពេល ១៤ នាទីនេះ សាស្ត្រាចារ្យ Hausmann បានពិភាក្សាអំពីកំណើនសេដ្ឋកិច្ចកម្ពុជា និងទស្សនវិស័យសេដ្ឋកិច្ចនាពេលអនាគត ស្វែងយល់ពីសារៈសំខាន់នៃពិពិធកម្មសេដ្ឋកិច្ចសម្រាប់ការអភិវឌ្ឍប្រកបដោយភាពធន់ និងនិរន្តរភាព និងតួនាទីរបស់ដៃគូអភិវឌ្ឍន៍ដែលកំពុងធ្វើការនៅកម្ពុជា។

អូស្ត្រាលីប្តេជ្ញាលើកកម្ពស់កិច្ចសន្ទនាគោលនយោបាយយុទ្ធសាស្ត្រ ដើម្បីសម្រេចបានភាពរឹងមាំ និងវិបុលភាពរបស់។

https://youtu.be/j9dJGzAAsiw

អូស្ត្រាលីគាំទ្រកម្ពុជាក្នុងការជំរុញសក្តានុពលឧស្សាហកម្មស្វាយចន្ទី

តើអ្នកដឹងទេថា កម្ពុជាជាប្រទេសផលិតគ្រាប់ស្វាយចន្ទីធំជាងគេទីពីរលើពិភពលោក? 

ក្នុងឆ្នាំ២០២៤ កម្ពុជាបានផលិតគ្រាប់ស្វាយចន្ទីឆៅជាង ៨៨ ម៉ឺនតោន ប៉ុន្តែតិចជាង ១០% ប៉ុណ្ណោះ នៃគ្រាប់ស្វាយចន្ទីសរុប ដែលត្រូវបានកែច្នៃក្នុងស្រុក ដោយភាគច្រើនត្រូវបាននាំចេញ។ នេះជាឱកាសអាជីវកម្មដ៏ធំដើម្បីទាញយកបន្ថែមតម្លៃ តាមរយៈការកែច្នៃក្នុងស្រុក បង្កើនការលក់ និងផ្តល់អត្ថប្រយោជន៍ដល់កសិករ អ្នកកែច្នៃ និងសហគមន៍។ 

អូស្ត្រាលីកំពុងសហការជាមួយរាជរដ្ឋាភិបាលកម្ពុជា ដើម្បីបង្កើតគោលនយោបាយគាំទ្រអ្នកវិនិយោគក្នុងវិស័យកសិកម្ម និងកសិ-ចំណីអាហារ។ តាមរយៈកម្មវិធី CAPRED ដ៏សំខាន់របស់យើង អូស្ត្រាលីគាំទ្រអ្នកផលិតគ្រាប់ស្វាយចន្ទីខ្នាតតូច និងមធ្យម ដើម្បីបង្កើនសមត្ថភាពក្នុងការកែច្នៃ ទាក់ទាញការវិនិយោគកាន់តែច្រើន និងជួយពង្រីកទីផ្សាររបស់ពួកគេទៅកាន់អន្តរជាតិ។ 

សូមទស្សនាវីដេអូនេះ ដើម្បីស្វែងយល់បន្ថែមអំពីសក្តានុពលគ្រាប់ស្វាយចន្ទីរបស់កម្ពុជា។ https://youtu.be/cbH8hU4_JuA 

ប្រទេសអូស្ត្រាលី តាមរយៈកម្មវិធីភាពជាដៃគូ កម្ពុជា អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED) បានអញ្ជើញ លោកសាស្រ្តាចារ្យ Ricardo Hausmann ស្ថាបនិក និង នាយកស្ថាប័នស្រាវជ្រាវ Growth Lab នៃសាកលវិទ្យាល័យ Harvard មកកម្ពុជាក្នុងខែកុម្ភៈ ដើម្បីដឹកនាំសិក្ខាសាលាជាន់ខ្ពស់ស្តីពីយុទ្ធសាស្ត្រពិពិធកម្មសេដ្ឋកិច្ច ក៏ដូចជា បានជួបជាមួយថ្នាក់ដឹកនាំ ដែលមកពីស្ថាប័នរាជរដ្ឋាភិបាល ដៃគូអភិវឌ្ឍន៍ និងវិស័យឯកជនផ្សេងៗ។
 
លោកសាស្ត្រាចារ្យ Hausmann បានបញ្ចប់ទស្សនកិច្ចរបស់លោក ដោយចែករំលែកទស្សនៈរបស់លោក អំពីស្ថានភាពសេដ្ឋកិច្ចនាពេលអនាគត និងអាទិភាពនានារបស់ប្រទេសកម្ពុជា និងការរួមចំណែករបស់អូស្ត្រាលី ក្នុ្ងងន័យគាំទ្រឱ្យបាននូវបរិវត្តកម្មសេដ្ឋកិច្ច នៅកម្ពុជា។
 https://www.youtube.com/watch?v=--3y3pX6uVw&t=177s

អូស្ត្រាលីបានរៀបចំសិក្ខាសាលាជាន់ខ្ពស់មួយ នៅថ្ងៃទី២០ ខែកុម្ភៈ ឆ្នាំ២០២៥ ក្នុងគោលបំណងស្វែងយល់អំពីយុទ្ធសាស្រ្តកំណើនសម្រាប់ការធ្វើពិពិធកម្មសេដ្ឋកិច្ចរបស់ប្រទេសកម្ពុជា និងលើកកម្ពស់ភាពធន់របស់ខ្លួន ដែលសិក្ខាសាលានេះគាំទ្រដោយ CAPRED ។ ព្រឹត្តិការណ៍នេះមានការចូលរួមពីសាស្ត្រាចារ្យ Hausmann ស្ថាបនិក និងជានាយកនៃ Growth Lab របស់ Harvard ដែលល្បីល្បាញដោយសារជំនាញរបស់គាត់ក្នុងការវិនិច្ឆ័យកំណើន និងភាពស្មុគស្មាញសេដ្ឋកិច្ច។

ក្រោមអធិបតីភាព ឯកឧត្តម ស៊ុន ចាន់ថុល, ឯកឧត្តម. វង្ស ស៊ីវិសុទ្ធ និង ឯកឧត្តម លោក Derek Yip សិក្ខាសាលាបាននាំមន្ត្រីរដ្ឋាភិបាល និងដៃគូអភិវឌ្ឍន៍រួមគ្នា ដើម្បីជំរុញការពិភាក្សាគោលនយោបាយយុទ្ធសាស្ត្រ។

គំនិតផ្តួចផ្តើមនេះគូសបញ្ជាក់ពីការប្តេជ្ញាចិត្តរបស់អូស្ត្រាលីចំពោះកំណើនសេដ្ឋកិច្ច និងភាពធន់របស់កម្ពុជា។

សម្រាប់ព័ត៌មានបន្ថែម អំពីលោកសាស្ត្រាចារ្យ Ricardo Hausmann និងនាយកស្ថាប័នស្រាវជ្រាវ Growth Lab នៃសាកលវិទ្យាល័យ Harvard សូមចូលទៅកាន់តំណភ្ជាប់ខាងក្រោម៖ https://www.hks.harvard.edu/faculty/ricardo-hausmann | https://growthlab.hks.harvard.edu/

ស្វែងយល់បន្ថែមអំពី CAPRED៖ www.capred.org | www.youtube.com/@CAPREDProgram

គណៈប្រតិភូជាង ៥០០ នាក់មកពីខាងស្ថាប័នរាជរដ្ឋាភិបាល ដៃគូអភិវឌ្ឍន៍ និងវិស័យឯកជន បានមកជួបជុំគ្នានៅក្នុងសន្និសិទចក្ខុវិស័យប្រទេសកម្ពុជា ឆ្នាំ២០២៥ ដែលរៀបចំដោយវិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI) ឆ្នាំនេះ ដើម្បីពិភាក្សាអំពីយុទ្ធសាស្ត្រដែលកម្ពុជាអាចសម្រេចបាននូវកំណើនសេដ្ឋកិច្ចប្រកបដោយគុណភាពខ្ពស់ និងនិរន្តរភាពនៅក្នុងបរិបទនៃពិភពលោកដែលកាន់តែប្រឈម។ 

អូស្ត្រាលី តាមរយៈកម្មវិធី CAPRED មានកិត្តិយសដែលបានក្លាយជាអ្នកឧបត្ថម្ភផ្តាច់មុខសម្រាប់សន្និសីទដ៏សំខាន់នេះ។

តើកម្ពុជាគួររក្សា និងពន្លឿនកំណើនសេដ្ឋកិច្ចអោយកាន់តែរឹងមាំបានដោយរៀបណា ក្នុងបរិបទសម្ពាធសេដ្ឋកិច្ច ភូមិសាស្ត្រនយោបាយ និងបរិស្ថាន? តើអ្វីជាយុទ្ធសាស្ត្រថ្មីដែលត្រូវអនុវត្ត ហើយតើគួរប្រតិបត្តិនូវគោលនយោបាយអោយមានប្រសិទ្ធភាពដោយរបៀបណា? 

ថ្នាក់ដឹកនាំកំពូលៗមកពីស្ថាប័នរាជរដ្ឋាភិបាល រួមមាន សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដៃគូអភិវឌ្ឍន៍ វិទ្យាស្ថានស្រាវជ្រាវ និងវិស័យឯកជន នឹងមកជួបជុំគ្នានៅរាជធានីភ្នំពេញនៅថ្ងៃទី៤ ខែមីនា ដើម្បីឆ្លើយតបនូវសំណួរទាំងនេះ និងមានអ្វីច្រើនទៀតនៅក្នុងសន្និសីទចក្ខុវិស័យប្រទេសកម្ពុជាឆ្នាំ ២០២៥។ 

អូស្ត្រាលីតាមរយៈកម្មវិធី CAPRED ជាអ្នកគាំទ្រតែមួយគត់សម្រាប់សន្និសីទចក្ខុវិស័យប្រទេសកម្ពុជានៅឆ្នាំនេះ។ នេះបញ្ជាក់ពីការបន្តការប្តេជ្ញាចិត្តរបស់យើងចំពោះកិច្ចសន្ទនាគោលនយោបាយដ៏មានអត្ថន័យដែលជំរុញឱ្យមានលទ្ធផលជាក់ស្តែងនេះ។ 

អូស្ត្រាលីកំពុងសហការយ៉ាងជិតស្និទ្ធជាមួយកម្ពុជា ដើម្បីពង្រីកលទ្ធភាពទទួលបានទឹកស្អាតប្រើប្រាស់។ ក្នុងរយៈពេលមួយទសវត្សរ៍កន្លងមកនេះ យើងបានគាំទ្រដល់គម្រោងហេដ្ឋារចនាសម្ព័ន្ធទឹកស្អាតជិត ១០០ គម្រោង ដែលជួយដល់ប្រជាជនកម្ពុជានៅតាមជនបទជាង ១,២ លាននាក់ ទទួលបានទឹកស្អាតប្រើប្រាស់។   
 
នៅក្នុងខេត្តកំពង់ធំសប្តាហ៍នេះ លោកឯកអគ្គរដ្ឋទូត យីប បានទៅទស្សនារោងចក្រផលិតទឹកស្អាតដែលគាំទ្រដោយរដ្ឋាភិបាលអូស្ត្រាលី និងបានជួបប្រជាពលរដ្ឋដែលបច្ចុប្បន្ននេះមានលទ្ធភាពប្រើប្រាស់ទឹកស្អាតនៅក្នុងផ្ទះរបស់ពួកគេ។ 
 
📹 សូមទស្សនាវីដេអូនេះ ដើម្បីមើលឥទ្ធិពលនៃកម្មវិធីនេះ! 

ការកៀរដីដោយប្រើប្រព័ន្ធឡាស៊ែរកំពុងជួយកែប្រែមុខមាត់ឧស្សាហកម្មស្រូវ-អង្ករ របស់កម្ពុជា ដោយបង្កើនផលិតភាព និងជួយកសិករត្រៀមខ្លួនដើម្បីប្រឈមមុខនឹងបញ្ហាបម្រែបម្រួលអាកាសធាតុ។ បច្ចេកវិទ្យាទំនើបនេះ ធានាបាននូវការកៀរដីដែលមានភាពជាក់លាក់ ជួយសន្សំសំចៃទឹក កាត់បន្ថយការចំណាយ កាត់បន្ថយសត្វល្អិតចង្រៃ និងបង្កើនគុណភាព និងទិន្នផលស្រូវ។ 

ដោយមានការគាំទ្រពីរដ្ឋាភិបាលអូស្ត្រាលី លោក មឿន សរ អ្នកផ្តល់សេវាកម្មកៀរដីដោយប្រើប្រព័ន្ធឡាស៊ែរនេះនៅខេត្តបន្ទាយមានជ័យ ហើយបានពង្រីកអាជីវកម្មរបស់គាត់ពីការផ្តល់សេវាកម្មកៀរដីពី ៣ហិចតា ទៅ ១០០ ហិកតាក្នុងមួយឆ្នាំ។  

កសិករកម្ពុជាជាច្រើនពឹងផ្អែកលើផលិតផលគីមីដែលមានតម្លៃខ្ពស់ ដែលអាចធ្វើឲ្យប៉ះពាល់ដល់សុខភាព និងបរិស្ថាន។ ដើម្បីដោះស្រាយបញ្ហាទាំងនេះ អូស្ត្រាលីបានសហការជាមួយវិស័យឯកជនដើម្បីណែនាំកសិករពីការប្រើប្រាស់ដ្រូនកសិកម្ម។ 

អ្នកស្រី តូ កុសល ជាអ្នកផ្តល់សេវាកម្មដ្រូនកសិកម្ម នៅខេត្តបាត់ដំបង បានជួយកសិករក្នុងស្រុកជាង ៨០ភាគរយ ឱ្យប្រើប្រាស់បច្ចេកវិទ្យានេះ។ ជាមួយនឹងដ្រូនកសិកម្ម អ្នកស្រីកំពុងជួយដល់កសិករដើម្បី៖ 

🪲 កំចាត់សត្វល្អិតប្រកបដោយប្រសិទ្ធភាព ដើម្បីកាត់បន្ថយការខូចខាតដំណាំ 

💧សន្សំសំចៃទឹក 

🌱កាត់បន្ថយការប្រើប្រាស់សារធាតុគីមី 

👨‍️ កាត់បន្ថយហានិភ័យដល់សុខភាពកម្មករ 

🌾បង្កើនផលិតភាព 

ដោយសារការកើនឡើងនូវតម្រូវការនេះ អ្នកស្រី កុសល កំពុងពង្រីកសេវាកម្មរបស់ខ្លួន ដើម្បីចូលរួមអភិវឌ្ឍសហគមន៍។ តាមរយៈកម្មវិធី CAPRED អូស្ត្រាលីកំពុងធ្វើការដើម្បីគាំទ្រការប្រើប្រាស់ដ្រូនកសិកម្មនៅក្នុងតំបន់ផ្សេងៗទៀតក្នុងប្រទេសកម្ពុជា រួមចំណែកដល់កំណើនសេដ្ឋកិច្ចប្រកបដោយនិរន្តរភាព បរិយាបន្ន និងភាពធន់។ 

តើលោកអ្នកដឹងទេ? អាជីវកម្មលើវិស័យកសិកម្មកម្ពុជាភាគច្រើន ត្រូវតែបញ្ជូនគំរូផលិតផលទៅបរទេសសម្រាប់ធ្វើតេស្តមុននឹងនាំចេញ។ ការនេះ នាំឱ្យមានការចំណាយថវិកាខ្ពស់ និងពេលវេលាច្រើន ដែលបានរារាំងក្រុមហ៊ុនទាំងនោះលើការប្រកួតប្រជែងសម្រាប់នាំចេញ។ ថ្មីៗនេះ អូស្ត្រាលីបានដាក់ឱ្យមានដំណើរការកិច្ចសហប្រតិបត្តិការជាមួយវិទ្យាស្ថានប៉ាស្ទ័រកម្ពុជា ដើម្បីបង្កើតសេវាកម្មធ្វើតេស្តក្នុងប្រទេសដែលទទួលស្គាល់ សម្រាប់វិភាគរក កាកសំណល់ថ្នាំកសិកម្ម កាកសំណល់ថ្នាំផ្សះ និងលោហៈធ្ងន់។ គំនិតផ្តួចផ្តើមនេះ នឹងជួយអាជីវកម្មធានាសុវត្ថិភាព ផលិតផលចំណីអាហារគុណភាពខ្ពស់ និងពង្រីកទៅកាន់ទីផ្សារថ្មីៗ។ អូស្ត្រាលី តាមរយៈកម្មវិធី CAPRED មានគោលដៅជួយកម្ពុជាបង្កើនសមត្ថភាពនាំចេញ ដែលរួមចំណែកដល់កំណើនសេដ្ឋកិច្ចប្រកបដោយភាពធន់ បរិយាបន្ន និងនិរន្តរភាព។