អូស្ត្រាលីបានរៀបចំសិក្ខាសាលាជាន់ខ្ពស់មួយ នៅថ្ងៃទី២០ ខែកុម្ភៈ ឆ្នាំ២០២៥ ក្នុងគោលបំណងស្វែងយល់ អំពីយុទ្ធសាស្ត្រកំណើន ដើម្បីពិភាក្សាលើយុទ្ធសាស្រ្តបង្កើនពិពិធកម្មសេដ្ឋកិច្ចកម្ពុជា និងបង្កើតសេដ្ឋកិច្ចដែលប្រកបដោយភាពធន់ជាងមុនក្នុងពេលខាងមុខ។ សិក្ខាសាលានេះ គាំទ្រដោយកម្មវិធីភាពជាដៃគូ កម្ពុជា អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED) និងបានអញ្ជើញវាគ្មិនពិសេស គឺលោកសាស្ត្រាចារ្យ Hausmann ស្ថាបនិក និងជានាយកវិទ្យាស្ថានស្រាវជ្រាវ Growth Lab របស់សាកលវិទ្យាល័យ Harvard  ដែលមានជំនាញអន្តរជាតិ ក្នុងការអភិវឌ្ឍវិធីសាស្រ្ត ក្នុងការវិភាគលើកំណើន (Growth Diagnostics) និងសេដ្ឋកិច្ចដែលមានពិពិធភាព (Economic Complexity) ។

ឯកឧត្តម ស៊ុន ចាន់ថុល ឧបនាយករដ្ឋមន្រ្តី និងអនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា ឯកឧត្តម  វង្សី វិស្សុត ឧបនាយករដ្ឋមន្រ្តីប្រចាំការ ទទួលបន្ទុក ទីស្តីការគណៈរដ្ឋមន្រ្តី និងឯកឧត្តម ដេរីក យីប ឯកអគ្គរដ្ឋទូតអូស្ត្រាលីប្រចាំព្រះរាជាណាចក្រកម្ពុជា បានអញ្ជើញជាអធិបតីក្នុងសិក្ខាសាលានេះ។ សិក្ខាសាលានេះផងដែរ មានការចូលរួមពីមន្រ្តីជាន់ខ្ពស់ខាងទីស្តីការគណៈរដ្ឋមន្រ្តី ក្រសួង-ស្ថាប័នរាជរដ្ឋាភិបាល និងដៃគូអភិវឌ្ឍន៍នានា។ 

សិក្ខាសាលានេះ បានសង្កត់ធ្ងន់លើការប្តេជ្ញាចិត្ដ របស់អូស្ត្រាលីជាបន្តបន្ទាប់ ក្នុងការជំរុញកិច្ចសន្ទនាគោលនយោបាយជាយុទ្ធសាស្ត្រ សម្រាប់បង្កើនវិបុលភាព និងភាពធន់របស់កម្ពុជា។ 

https://youtu.be/--3y3pX6uVw 

សម្រាប់ព័ត៌មានបន្ថែម អំពីលោកសាស្ត្រាចារ្យ Ricardo Hausmann និងនាយកស្ថាប័នស្រាវជ្រាវ Growth Lab នៃសាកលវិទ្យាល័យ Harvard សូមចូលទៅកាន់តំណភ្ជាប់ខាងក្រោម៖

https://www.hks.harvard.edu/faculty/ricardo-hausmann

https://growthlab.hks.harvard.edu/

ស្វែងយល់បន្ថែមអំពី CAPRED៖

www.capred.org

https://www.youtube.com/@CAPREDProgram

គណៈប្រតិភូជាង ៥០០ នាក់មកពីខាងស្ថាប័នរាជរដ្ឋាភិបាល ដៃគូអភិវឌ្ឍន៍ និងវិស័យឯកជន បានមកជួបជុំគ្នានៅក្នុងសន្និសិទចក្ខុវិស័យប្រទេសកម្ពុជា ឆ្នាំ២០២៥ ដែលរៀបចំដោយវិទ្យាស្ថានបណ្តុះបណ្តាល និងស្រាវជ្រាវដើម្បីអភិវឌ្ឍន៍កម្ពុជា (CDRI) ឆ្នាំនេះ ដើម្បីពិភាក្សាអំពីយុទ្ធសាស្ត្រដែលកម្ពុជាអាចសម្រេចបាននូវកំណើនសេដ្ឋកិច្ចប្រកបដោយគុណភាពខ្ពស់ និងនិរន្តរភាពនៅក្នុងបរិបទនៃពិភពលោកដែលកាន់តែប្រឈម។ 

អូស្ត្រាលី តាមរយៈកម្មវិធី CAPRED មានកិត្តិយសដែលបានក្លាយជាអ្នកឧបត្ថម្ភផ្តាច់មុខសម្រាប់សន្និសីទដ៏សំខាន់នេះ។

តើកម្ពុជាគួររក្សា និងពន្លឿនកំណើនសេដ្ឋកិច្ចអោយកាន់តែរឹងមាំបានដោយរៀបណា ក្នុងបរិបទសម្ពាធសេដ្ឋកិច្ច ភូមិសាស្ត្រនយោបាយ និងបរិស្ថាន? តើអ្វីជាយុទ្ធសាស្ត្រថ្មីដែលត្រូវអនុវត្ត ហើយតើគួរប្រតិបត្តិនូវគោលនយោបាយអោយមានប្រសិទ្ធភាពដោយរបៀបណា? 

ថ្នាក់ដឹកនាំកំពូលៗមកពីស្ថាប័នរាជរដ្ឋាភិបាល រួមមាន សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដៃគូអភិវឌ្ឍន៍ វិទ្យាស្ថានស្រាវជ្រាវ និងវិស័យឯកជន នឹងមកជួបជុំគ្នានៅរាជធានីភ្នំពេញនៅថ្ងៃទី៤ ខែមីនា ដើម្បីឆ្លើយតបនូវសំណួរទាំងនេះ និងមានអ្វីច្រើនទៀតនៅក្នុងសន្និសីទចក្ខុវិស័យប្រទេសកម្ពុជាឆ្នាំ ២០២៥។ 

អូស្ត្រាលីតាមរយៈកម្មវិធី CAPRED ជាអ្នកគាំទ្រតែមួយគត់សម្រាប់សន្និសីទចក្ខុវិស័យប្រទេសកម្ពុជានៅឆ្នាំនេះ។ នេះបញ្ជាក់ពីការបន្តការប្តេជ្ញាចិត្តរបស់យើងចំពោះកិច្ចសន្ទនាគោលនយោបាយដ៏មានអត្ថន័យដែលជំរុញឱ្យមានលទ្ធផលជាក់ស្តែងនេះ។ 

អូស្ត្រាលីកំពុងសហការយ៉ាងជិតស្និទ្ធជាមួយកម្ពុជា ដើម្បីពង្រីកលទ្ធភាពទទួលបានទឹកស្អាតប្រើប្រាស់។ ក្នុងរយៈពេលមួយទសវត្សរ៍កន្លងមកនេះ យើងបានគាំទ្រដល់គម្រោងហេដ្ឋារចនាសម្ព័ន្ធទឹកស្អាតជិត ១០០ គម្រោង ដែលជួយដល់ប្រជាជនកម្ពុជានៅតាមជនបទជាង ១,២ លាននាក់ ទទួលបានទឹកស្អាតប្រើប្រាស់។   
 
នៅក្នុងខេត្តកំពង់ធំសប្តាហ៍នេះ លោកឯកអគ្គរដ្ឋទូត យីប បានទៅទស្សនារោងចក្រផលិតទឹកស្អាតដែលគាំទ្រដោយរដ្ឋាភិបាលអូស្ត្រាលី និងបានជួបប្រជាពលរដ្ឋដែលបច្ចុប្បន្ននេះមានលទ្ធភាពប្រើប្រាស់ទឹកស្អាតនៅក្នុងផ្ទះរបស់ពួកគេ។ 
 
📹 សូមទស្សនាវីដេអូនេះ ដើម្បីមើលឥទ្ធិពលនៃកម្មវិធីនេះ! 

ការកៀរដីដោយប្រើប្រព័ន្ធឡាស៊ែរកំពុងជួយកែប្រែមុខមាត់ឧស្សាហកម្មស្រូវ-អង្ករ របស់កម្ពុជា ដោយបង្កើនផលិតភាព និងជួយកសិករត្រៀមខ្លួនដើម្បីប្រឈមមុខនឹងបញ្ហាបម្រែបម្រួលអាកាសធាតុ។ បច្ចេកវិទ្យាទំនើបនេះ ធានាបាននូវការកៀរដីដែលមានភាពជាក់លាក់ ជួយសន្សំសំចៃទឹក កាត់បន្ថយការចំណាយ កាត់បន្ថយសត្វល្អិតចង្រៃ និងបង្កើនគុណភាព និងទិន្នផលស្រូវ។ 

ដោយមានការគាំទ្រពីរដ្ឋាភិបាលអូស្ត្រាលី លោក មឿន សរ អ្នកផ្តល់សេវាកម្មកៀរដីដោយប្រើប្រព័ន្ធឡាស៊ែរនេះនៅខេត្តបន្ទាយមានជ័យ ហើយបានពង្រីកអាជីវកម្មរបស់គាត់ពីការផ្តល់សេវាកម្មកៀរដីពី ៣ហិចតា ទៅ ១០០ ហិកតាក្នុងមួយឆ្នាំ។  

កសិករកម្ពុជាជាច្រើនពឹងផ្អែកលើផលិតផលគីមីដែលមានតម្លៃខ្ពស់ ដែលអាចធ្វើឲ្យប៉ះពាល់ដល់សុខភាព និងបរិស្ថាន។ ដើម្បីដោះស្រាយបញ្ហាទាំងនេះ អូស្ត្រាលីបានសហការជាមួយវិស័យឯកជនដើម្បីណែនាំកសិករពីការប្រើប្រាស់ដ្រូនកសិកម្ម។ 

អ្នកស្រី តូ កុសល ជាអ្នកផ្តល់សេវាកម្មដ្រូនកសិកម្ម នៅខេត្តបាត់ដំបង បានជួយកសិករក្នុងស្រុកជាង ៨០ភាគរយ ឱ្យប្រើប្រាស់បច្ចេកវិទ្យានេះ។ ជាមួយនឹងដ្រូនកសិកម្ម អ្នកស្រីកំពុងជួយដល់កសិករដើម្បី៖ 

🪲 កំចាត់សត្វល្អិតប្រកបដោយប្រសិទ្ធភាព ដើម្បីកាត់បន្ថយការខូចខាតដំណាំ 

💧សន្សំសំចៃទឹក 

🌱កាត់បន្ថយការប្រើប្រាស់សារធាតុគីមី 

👨‍️ កាត់បន្ថយហានិភ័យដល់សុខភាពកម្មករ 

🌾បង្កើនផលិតភាព 

ដោយសារការកើនឡើងនូវតម្រូវការនេះ អ្នកស្រី កុសល កំពុងពង្រីកសេវាកម្មរបស់ខ្លួន ដើម្បីចូលរួមអភិវឌ្ឍសហគមន៍។ តាមរយៈកម្មវិធី CAPRED អូស្ត្រាលីកំពុងធ្វើការដើម្បីគាំទ្រការប្រើប្រាស់ដ្រូនកសិកម្មនៅក្នុងតំបន់ផ្សេងៗទៀតក្នុងប្រទេសកម្ពុជា រួមចំណែកដល់កំណើនសេដ្ឋកិច្ចប្រកបដោយនិរន្តរភាព បរិយាបន្ន និងភាពធន់។ 

តើលោកអ្នកដឹងទេ? អាជីវកម្មលើវិស័យកសិកម្មកម្ពុជាភាគច្រើន ត្រូវតែបញ្ជូនគំរូផលិតផលទៅបរទេសសម្រាប់ធ្វើតេស្តមុននឹងនាំចេញ។ ការនេះ នាំឱ្យមានការចំណាយថវិកាខ្ពស់ និងពេលវេលាច្រើន ដែលបានរារាំងក្រុមហ៊ុនទាំងនោះលើការប្រកួតប្រជែងសម្រាប់នាំចេញ។ ថ្មីៗនេះ អូស្ត្រាលីបានដាក់ឱ្យមានដំណើរការកិច្ចសហប្រតិបត្តិការជាមួយវិទ្យាស្ថានប៉ាស្ទ័រកម្ពុជា ដើម្បីបង្កើតសេវាកម្មធ្វើតេស្តក្នុងប្រទេសដែលទទួលស្គាល់ សម្រាប់វិភាគរក កាកសំណល់ថ្នាំកសិកម្ម កាកសំណល់ថ្នាំផ្សះ និងលោហៈធ្ងន់។ គំនិតផ្តួចផ្តើមនេះ នឹងជួយអាជីវកម្មធានាសុវត្ថិភាព ផលិតផលចំណីអាហារគុណភាពខ្ពស់ និងពង្រីកទៅកាន់ទីផ្សារថ្មីៗ។ អូស្ត្រាលី តាមរយៈកម្មវិធី CAPRED មានគោលដៅជួយកម្ពុជាបង្កើនសមត្ថភាពនាំចេញ ដែលរួមចំណែកដល់កំណើនសេដ្ឋកិច្ចប្រកបដោយភាពធន់ បរិយាបន្ន និងនិរន្តរភាព។

តើលោកអ្នកដឹងទេ? ការកៀរដីឱ្យរាបស្មើដោយប្រើប្រាស់បច្ចេកវិទ្យាឡាស៊ែរ អាចជួយកសិករបង្កើនទិន្នផលស្រូវ និងរកប្រាក់ចំណូលបានកាន់តែច្រើនជាងមុន។ អូស្ត្រាលីបានសហការជាមួយក្រុមហ៊ុនឯកជនក្នុងប្រទេសកម្ពុជា ដើម្បីដាក់ឱ្យប្រើប្រាស់ឧបករណ៍ពង្រៀបដីដោយប្រើបច្ចេកវិទ្យាឡាស៊ែរ។ បច្ចេកវិទ្យានេះ ជួយកសិករបង្កើនប្រសិទ្ធភាពលើការប្រើប្រាស់ធាតុចូលកសិកម្ម កាត់បន្ថយហានិភ័យបង្កដោយសត្វល្អិតចង្រៃ និងបង្កើនគុណភាពនិងទិន្នផលស្រូវ។ លោក ហូ សុឃី កសិកររស់នៅខេត្តបន្ទាយមានជ័យ បានសម្រេចចិត្តទទួលយកសេវាកៀរពង្រៀបដីដោយបច្ចេកវិទ្យាឡាស៊ែរ បន្ទាប់ពីបានឃើញទិន្នផលស្រូវពូរបស់គាត់ការកើនឡើង។ តាមរយៈការប្រើប្រាស់បច្ចេកវិទ្យាឡាស៊ែរនេះ លោក សុឃី អាចសន្សំសំចៃពេលវេលា និងកាត់បន្ថយការចំណាយលើការបូមទឹក ខណៈដែលទិន្នផលស្រូវ កើនពី ១,៥ តោន ទៅ ៦ តោនក្នុងមួយហិកតា។ អូស្ត្រាលីតាមរយៈកម្មវិធីCAPRED កំពុងពន្លឿនការការប្រើប្រាស់បច្ចេកវិទ្យានេះ ដើម្បីពង្រឹងឧស្សាហកម្មស្រូវអង្ករកម្ពុជា និងគាំទ្រដល់គោលដៅក្នុងការនាំចេញអង្ករឱ្យបានមួយលានតោននៅត្រឹបឆ្នាំ២០២៥។

ប្រទេសយើងទាំងពីរមានគោលដៅថាមពលកកើតឡើងវិញ ឧបសគ្គ និងឱកាសស្រដៀងគ្នា ដូច្នេះហើយយើងមានអ្វីជាច្រើនដែលអាចរៀនពីគ្នាទៅវិញទៅមកបាន។ ឆ្នាំនេះ អូស្ត្រាលីបានរៀបចំដំណើរទស្សនកិច្ចសម្រាប់គណៈប្រតិភូមន្ត្រីថាមពលកម្ពុជា ដើម្បីសិក្សាអំពីវឌ្ឍនភាព និងបញ្ហាប្រឈមនានារបស់ប្រទេសអូស្ត្រាលី ក្នុងការផ្លាស់ប្តូរថាមពលស្អាត។ សូមទស្សនាវីដេអូនេះ ដើម្បីស្វែងយល់អំពីបទពិសោធន៍របស់ កញ្ញា ឈួង សៀងហុង ដែលជាមន្ត្រីគ្រប់គ្រង និងដាក់អោយដំណើរការប្រព័ន្ធ SCADA នៅអគ្គិសនីកម្ពុជា អំឡុងពេលទស្សនកិច្ចនៅប្រទេសអូស្ត្រាលី។

យើងកំពុងធ្វើការរួមគ្នាដើម្បីពង្រឹងភាពធន់នឹងអាកាសធាតុ បង្កើនវិស័យថាមពលស្អាត និងទាក់ទាញហិរញ្ញវត្ថុអាកាសធាតុ ដើម្បីសម្រេចបាននូវគោលដៅអព្យាក្រឹតកាបូនរបស់កម្ពុជានៅត្រឹមឆ្នាំ ២០៥០។ អូស្ត្រាលីមានមោទនភាពក្នុងការក្លាយជាដៃគូផ្លូវការសម្រាប់កិច្ចប្រជុំកំពូលស្តីពីការប្រែប្រួលអាកាសធាតុនៅកម្ពុជាឆ្នាំ ២០២៤ #CCCS24 ដែលជាវេទិកាដ៏ធំបំផុតមួយរបស់កម្ពុជា សម្រាប់ការចូលរួមពិភាក្សាអំពីបញ្ហាប្រឈម និងឱកាសអាកាសធាតុថ្មីៗ។ ចូលរួមជាមួយយើងនៅក្នុងកិច្ចប្រជុំកំពូលនេះ ដែលនឹងប្រព្រឹត្តទៅនៅថ្ងៃទី ២៤-២៥ ខែតុលា ឆ្នាំ ២០២៥ នៅសណ្ឋាគារឯករាជ្យ ខេត្តព្រះសីហនុ។ សូមទស្សនាវីដេអូនេះដើម្បីស្វែងយល់បន្ថែម!

អូស្ត្រាលីបានគាំទ្រវិស័យកសិកម្មកម្ពុជាអស់រយៈពេលជាង៦០ឆ្នាំមកហើយ។ ការគាំទ្រនេះ រួមមាន ការណែនាំបច្ចេកទេសកសិកម្មថ្មីៗ ការបង្កាត់ពូជស្រូវដែលធន់នឹងបម្រែបម្រួលអាកាសធាតុ និងការបង្កើត CARDI, វិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា ដែលជាវិទ្យាស្ថានស្រាវជ្រាវកសិកម្មដ៏ល្បីល្បាញរបស់កម្ពុជា ។ យើងមានមោទនភាពក្នុងការឧបត្ថម្ភវេទិកាស្រូវអង្ករកម្ពុជាឆ្នាំនេះ ដែលនឹងប្រព្រឹត្តទៅនៅថ្ងៃទី ១០-១២ ខែកញ្ញា នៅរាជធានីភ្នំពេញ ហើយវេទិកានេះក៏ជាឱកាសដ៏ល្អសម្រាប់អាជីវកម្មនានា ក្នុងការបង្ហាញផលិតផលអង្ករប្រណីត និងមានគុណភាពខ្ពស់របស់កម្ពុជា ក៏ដូចជាភ្ជាប់ទំនាក់ទំនងជាមួយអ្នកទិញដែលមានសក្តានុពលពីប្រទេសអូស្ត្រាលី និងបណ្តាប្រទេសផ្សេងៗទៀត។ យើងនៅតែបន្តសហការជាដៃគូជាមួយប្រទេសកម្ពុជា ដើម្បីជំរុញ ផលិតកម្មកសិផលស្រូវ ប្រកបដោយភាពធន់ បរិយាបន្ន និងនិរន្តរភាព ទៅលើការកែច្នៃ និងការនាំចេញ តាមរយៈកម្មវិធី CAPRED របស់យើង។ សូមទស្សនាវីដេអូ ដើម្បីស្វែងយល់បន្ថែម។

តើអ្នកដឹងទេ? ប្រមាណជា ៩៩.៨% នៃអាជីវកម្មកម្ពុជា គឺជាសហគ្រាសធុនមីក្រូ តូច និងមធ្យម (MSMEs) ហើយ ៦១% នៃ 0 ទាំងនោះមានស្រ្តីជាម្ចាស់។ ប្រទេសអូស្ត្រាលី តាមរយៈកម្មវិធីអភិវឌ្ឍន៍សេដ្ឋកិច្ចដ៏សំខាន់របស់ខ្លួន គឺកម្មវិធីភាពជាដៃគូ កម្ពុជា អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED) បានគាំទ្រក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) ក្នុងការបង្កើត និងដាក់ឱ្យដំណើរការ ក៏ដូចជាផ្សព្វផ្សាយអំពីផែនការយុទ្ធសាស្រ្តបញ្ជ្រាបសមភាពយេនឌ័រ ពិការភាព និងបរិយាបន្នសង្គម (GEDSI-MAP) ឆ្នាំ ២០២៣-២០២៨។ លោកជំទាវ ឡាយ ណាវីន រដ្ឋលេខាធិការ និងប្រធានក្រុមការងារ GEDSI នៃក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានគូសបញ្ជាក់ពីសារៈសំខាន់នៃផែនការនេះ ដើម្បីធានាឱ្យបាននូវឱកាសចូលរួម មិនត្រឹមតែសម្រាប់ស្រ្តីនោះទេ គឺរាប់បញ្ចូលទាំងជនមានពិការភាព ជនជាតិដើមភាគតិច និងជនដែលងាយរងគ្រោះផងដែរ។ មើលវីដេអូនេះ សម្រាប់ព័ត៌មានបន្ថែម។