អូស្ត្រាលីគាំទ្រទឹកស្អាតសម្រាប់ប្រជាជនកម្ពុជាទាំងអស់

សមាគមផ្គត់ផ្គង់ទឹកស្អាតអូស្ត្រាលី បានគាំទ្រសមាគមអ្នកផ្គត់ផ្គង់ទឹកស្អាតកម្ពុជា (CWA) ក្នុងការរៀបចំផែនការយុទ្ធសាស្ត្រថ្មីរបស់ខ្លួនសម្រាប់ឆ្នាំ ២០២៥-២០៣០ ដោយផ្តោតលើការពង្រឹងសមត្ថភាពរបស់ប្រតិបត្តិករទឹកស្អាតឯកជន ការកែលម្អគុណភាពសេវាកម្ម និងការពង្រឹងភាពធន់នៅក្នុងប្រព័ន្ធផ្គត់ផ្គង់ទឹក ជាពិសេសសហគមន៍នៅតាមតំបន់ដាច់ស្រយាល។ 

ឯកឧត្តម ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងលោកស្រី Kirsty Harris ប្រធានកិច្ចសហប្រតិបត្តិការអភិវឌ្ឍន៍ប្រចាំស្ថានទូតអូស្ត្រាលី បានចូលរួមសន្និបាតប្រចាំឆ្នាំរបស់សមាគមអ្នកផ្គត់ផ្គង់ទឹកស្អាតកម្ពុជា ដើម្បីចេញផ្សាយនូវផែនការយុទ្ធសាស្រ្តនេះដល់សមាជិក ៣០០នាក់ របស់សមាគមអ្នកផ្គត់ផ្គង់ទឹកស្អាតកម្ពុជា។ 

កិច្ចសហការនេះ តាមរយៈកម្មវិធី CAPRED ដែលជាផ្នែកមួយនៃការប្តេជ្ញាចិត្តរបស់អូស្ត្រាលី ក្នុងការគាំទ្រកម្ពុជាឱ្យសម្រេចបាននូវលទ្ធភាពទទួលបានទឹកស្អាតជាសកលនៅឆ្នាំ ២០៣០។