អូស្ត្រាលីគាំទ្រអ្នកដោះស្រាយបញ្ហាផ្នែកអាកាសធាតុជំនាន់ក្រោយ

កម្ពុជាងាយរងផលប៉ះពាល់ខ្លាំងដោយសារបញ្ហាបង្កមកពីបម្រែបម្រួលអាកាសធាតុ។ ប្រសិនបើគ្មានដំណោះស្រាយយ៉ាងមានប្រសិទ្ធភាពនោះទេ ផលប៉ះពាល់ពីការប្រែប្រួលអាកាសធាតុអាចធ្វើអោយផលិតផលសរុបក្នុងស្រុក (GDP) របស់កម្ពុជាធ្លាក់ចុះដល់ទៅ ៩ ភាគរយនៅត្រឹមឆ្នាំ ២០៥០ ហើយប្រជាជនដែលងាយរងគ្រោះនឹងរងផលប៉ះពាល់ខ្លាំងបំផុត។

អូស្ត្រាលីមានមោទនភាពក្នុងការគាំទ្រកម្មវិធីយុវជនកម្ពុជាលើដំណោះស្រាយបញ្ហានៃការប្រែប្រួលអាកាសធាតុ (CYCC) ដែលជាវេទិកាផ្តល់សិទ្ធិអំណាចដល់យុវជនក្នុងការលើកកម្ពស់ការយល់ដឹង បង្កើតបណ្តាញទំនាក់ទំនង និងដឹកនាំសកម្មភាពទាក់ទងនឹងដំណោះស្រាយលើបញ្ហាអាកាសធាតុ។

កម្មវិធីនេះត្រូវបានបញ្ចប់ដោយសន្និសិទ CYCC ឆ្នាំ ២០២៥ ដែលបានប្រមូលផ្តុំយុវជនជាង ១៥០ នាក់មកពីវិទ្យាល័យ និងសាកលវិទ្យាល័យ ដើម្បីបង្ហាញពីដំណោះស្រាយអាកាសធាតុ ចាប់ពីការកាត់បន្ថយឧស្ម័នផ្ទះកញ្ចក់ក្នុងវិស័យកសិកម្ម រហូតដល់ការប្រើបច្ចេកវិទ្យាមនុស្សយន្ត ក្នុងការប្រយុទ្ធប្រឆាំងនឹងការបំពុលទឹក។

តាមរយៈកម្មវិធី CYCC អូស្ត្រាលីកំពុងជួយអោយយុវជនកម្ពុជាចូលរួមក្នុងការបង្កើតអនាគតដែលមានភាពធន់នឹងការប្រែប្រួលអាកាសធាតុបានយ៉ាងរឹងមាំ ទាំងនៅក្នុងប្រទេស និងក្រៅប្រទេស។