តើលោកអ្នកជាម្ចាស់អាជីវកម្មខ្នាតតូច ហើយមិនទាន់បានស្នើសុំអាជ្ញាប័ណ្ណដើម្បីដំណើរការមែនទេ? យើងមានដំណឹងល្អសម្រាប់លោកអ្នក។ ថ្មីៗនេះ ប្រទេសអូស្ត្រាលីបានគាំទ្រក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីបើកដំណើរការប្រព័ន្ធផ្តល់សេវាសាធារណៈឌីជីថលរបស់ខ្លួន សម្រាប់ស្នើសុំអាជ្ញាប័ណ្ណអាជីវកម្មអនឡាញ។ វិបផតថលនេះកាត់បន្ថយការចំណាយពេលវេលា និងកំលាំង ដោយយើងអាចសម្រួលដំណើរការក្នុងការស្នើសុំអាជ្ញាប័ណ្ណ ជាពិសេសវាផ្តល់អត្ថប្រយោជន៍ដល់ជនដែលមានពិការភាព ឬអ្នកដែលរស់នៅក្នុងតំបន់ដាច់ស្រយាល។ តាមរយៈប្រព័ន្ធផ្តល់សេវាសាធារណៈឌីជីថលនេះ លោកអ្នកអាចស្នើសុំប្រកាសដើម្បីបង្កើតសហគ្រាសធុនតូច និងមធ្យម (SMEs) ឬអាជីវកម្មសិប្បកម្ម ហើយស្នើសុំ ឬសុំបន្តអាជ្ញាប័ណ្ណ ដើម្បីដំណើរការអាជីវកម្មបែបនេះ។ គំនិតផ្តួចផ្តើមនេះមានគោលបំណងជំរុញកំណើនសេដ្ឋកិច្ចរបស់កម្ពុជា តាមរយៈការជួយបង្កើតជាផ្លូវការនូវវិស័យសហគ្រាសធុនតូចនិងមធ្យម សិប្បកម្ម និងឧស្សាហកម្ម ដែលមានជាង៧០%នៃការងារនៅក្នុងប្រទេសទាំងមូល។ អូស្ត្រាលីប្តេជ្ញាគាំទ្រកម្ពុជា ដើម្បីបង្កើតបរិយាកាសដែលអាចធ្វើអាជីវកម្ម ជំរុញកំណើនសេដ្ឋកិច្ច ប្រកបដោយភាពធន់ បរិយាបន្ន និងនិរន្តរភាព តាមរយៈកម្មវិធី CAPRED របស់ខ្លួន។ តើលោកអ្នកត្រៀមខ្លួនហើយឬនៅ? សូមចូលទៅកាន់ប្រព័ន្ធផ្តល់សេវាសាធារណៈឌីជីថល ដែលមាននៅទីនេះ៖ https://services.misti.gov.kh/ សូមទស្សនាវីដេអូ ដើម្បីស្វែងយល់បន្ថែម។

តើអ្នកដឹងទេ? ប្រមាណជា ៩៩.៨% នៃអាជីវកម្មកម្ពុជា គឺជាសហគ្រាសធុនមីក្រូ តូច និងមធ្យម (MSMEs) ហើយ ៦១% នៃទាំងនោះមានស្រ្តីជាម្ចាស់។ ប្រទេសអូស្ត្រាលី តាមរយៈកម្មវិធីអភិវឌ្ឍន៍សេដ្ឋកិច្ចដ៏សំខាន់របស់ខ្លួន គឺកម្មវិធីភាពជាដៃគូ កម្ពុជា អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED) បានគាំទ្រក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ (MISTI) ក្នុងការបង្កើត និងដាក់ឱ្យដំណើរការ ក៏ដូចជាផ្សព្វផ្សាយអំពីផែនការយុទ្ធសាស្រ្តបញ្ជ្រាបសមភាពយេនឌ័រ ពិការភាព និងបរិយាបន្នសង្គម (GEDSI-MAP) ឆ្នាំ ២០២៣-២០២៨។ លោកជំទាវ ឡាយ ណាវីន រដ្ឋលេខាធិការ និងប្រធានក្រុមការងារ GEDSI នៃក្រសួង ឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានគូសបញ្ជាក់ពីសារៈសំខាន់នៃផែនការនេះ ដើម្បីធានាឱ្យបាននូវឱកាសចូលរួម មិនត្រឹមតែសម្រាប់ស្រ្តីនោះទេ គឺរាប់បញ្ចូលទាំងជនមានពិការភាព ជនជាតិដើមភាគតិច និងជនដែលងាយរងគ្រោះផងដែរ។ មើលវីដេអូនេះ សម្រាប់ព័ត៌មានបន្ថែម។ Through its flagship economic development program, the Cambodia Australia Partnership for Resilient Economic Development (CAPRED), Australia supported the Ministry of Industry, Science, Technology & Innovation (MISTI) to develop, launch and disseminate the Gender Equality, Disability and Social Inclusion Mainstreaming Action Plan (GEDSI-MAP) 2023–2028. H.E. Lay Navinn, MISTI Secretary of State and Chairperson of the GEDSI Action Group, underscored the importance of the plan in ensuring opportunities for and participation by not only women but people with disability, ethnic minorities and other marginalised groups.

អូស្ត្រាលីមានសេចក្តីសោមនស្សរីករាយ ដែលបានគាំទ្រកម្ពុជាក្នុងការដាក់ឱ្យដំណើរការប្រព័ន្ធផ្តល់សេវាសាធារណៈឌីជីថលថ្មីមួយនេះ ក្នុងឱកាសទិវាជាតិ សហគ្រាសធុនមីក្រូ តូច និងមធ្យម ឆ្នាំ២០២៤ លើកទី ១។ កម្មវិធីនេះប្រព្រឹត្តិទៅ នៅថ្ងៃទី ២៧ ខែ មិថុនា ក្រោមអធិបតីភាព ឯកឧត្តមបណ្ឌិត អូន ព័ន្ធមុនីរ័ត្ន ឧបនាយករដ្ឋមន្ត្រីនៃប្រទេសកម្ពុជា ព្រមទាំងមានការចូលរួមដោយ សហគ្រិន និងតំណាងមកពីសមាគមធុរកិច្ច ស្ថាប័នក្រសួង និងដៃគូអភិវឌ្ឍន៍នានា។ ប្រព័ន្ធឌីជីថលមួយនេះ ជួយសម្រួលដល់ដំណើរការស្នើសុំអាជ្ញាប័ណ្ណ ដោយអនុញ្ញាតឱ្យ ម្ចាស់សហគ្រាសធុនតូច និងមធ្យម ម្ចាស់សិប្បកម្ម និងឧស្សាហកម្មអាចស្នើសុំ ឬបន្តអាជ្ញាប័ណ្ណរបស់ពួកគេបានតាមប្រព័ន្ធឌីជីថល ។ ប្រព័ន្ធឌីជីថលនេះ ត្រូវបានបង្កើតឡើងក្រោមភាពជាដៃគូរវាង ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងប្រទេសអូស្ត្រាលី តាមរយៈកម្មវិធី CAPRED ។ គំនិតផ្តួចផ្តើមនេះមានគោលបំណងធ្វើឱ្យប្រសើរឡើងនូវបរិយាកាសធុរកិច្ច ប្រកបដោយបរិយាបន្ន និងតម្លាភាពបន្ថែមទៀត ដើម្បីជំរុញកំណើនសេដ្ឋកិច្ចកម្ពុជាប្រកបដោយនិរន្តរភាព បរិយាបន្ន និងភាពធន់។ សូមទស្សនាវីដេអូ នៃកម្មវិធីសម្ពោធប្រព័ន្ធផ្តល់សេវាសាធារណៈឌីជីថលថ្មីមួយនេះ ដើម្បីស្វែងយល់បន្ថែម។

ប្រទេសកម្ពុជាបានដាក់ចេញនូវផែនការមហិច្ឆតាមួយស្តីពីថាមពលកកើតឡើងវិញ ដែលក្នុងនោះរួមមានគោលដៅធ្វើឲ្យ ៧០% នៃថាមពលទាំងអស់របស់កម្ពុជាក្លាយចេញពីប្រភពកកើតឡើងវិញឱ្យបាននៅត្រឹមឆ្នាំ២០៣០។ ក្នុងកិច្ចគាំទ្រប្រទេសកម្ពុជាសម្រេចឱ្យបានគោលដៅទាំងនេះ ប្រទេសអូស្ត្រាលីប្តេជ្ញាធ្វើការជាមួយកម្ពុជា ដើម្បីជួយជ្រោមជ្រែងដំណើរការផ្លាស់ប្តូរមកប្រើថាមពលស្អាតឱ្យប្រកបដោយជោគជ័យដូចបានគ្រោងទុក។ ថ្មីៗនេះ ប្រទេសអូស្ត្រាលីបានគាំទ្រគណៈប្រតិភូពីកម្ពុជាមួយក្រុមក្នុងការចុះបំពេញទស្សនកិច្ចនៅប្រទេសអូស្ត្រាលី ដើម្បីស្វែងយល់ពីបទពិសោធន៍នៅអូស្រ្តាលីក្នុងការរួមបញ្ចូលថាមពលកកើតឡើងវិញ ប្រភេទអថេរ។ ក្រោយពីទស្សនកិច្ចនេះបានបញ្ចប់ យើងបានជជែកជាមួយលោកបណ្ឌិត ដារិទ្ធ ដែលជាអនុប្រធានមជ្ឈមណ្ឌលជាតិបញ្ជូនអគ្គិសនីកម្ពុជា អំពីបទពិសោធន៍របស់គាត់នៅអូស្រ្តាលី។ សូមទស្សនាវីដេអូខាងក្រោមដើម្បីស្វែងយល់បន្ថែមពីដំណើរទស្សនកិច្ចមួយនេះ។

អូស្ត្រាលី តាមរយៈកម្មវិធី CAPRED បានសហការជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ក្នុងការបង្កើតប្រព័ន្ធផ្តល់សេវាសាធារណៈឌីជីថល សម្រាប់សហគ្រាសធុនតូច និងមធ្យម សិប្បកម្ម និងឧស្សាហកម្ម ដើម្បីស្នើសុំអាជ្ញាប័ណ្ណ។ ថ្នាលឌីជីថលមួយនេះ នឹងជួយជំរុញការបង្កើតអាជីវកម្មផ្លូវការ ក្នុងន័យបង្កើនសមត្ថភាពសហគ្រាស និងផលិតភាព ព្រមទាំងជំរុញកំណើនសេដ្ឋកិច្ច និងបង្កើនការវិនិយោគដោយផ្ទាល់ពីបរទេសផងដែរ។ ដើម្បីធានាឱ្យថ្នាលឌីជីថលមួយនេះ អាចប្រើប្រាស់បានប្រកបដោយប្រសិទ្ធភាព CAPRED និង ក្រសួង បានធ្វើសិក្ខាសាលាពិគ្រោះយោបល់ និងធ្វើតេស្តសាកល្បងថ្នាលឌីជីថល ជាមួយតំណាងមកពីសហគ្រាសធុនតូច និងមធ្យម សិប្បកម្ម និងឧស្សាហកម្ម។ លទ្ធផលនៃធាតុចូល និងមតិកែលម្អទាំងនោះ នឹងត្រូវបានបញ្ចូលទៅក្នុងដំណើរការនៃការបង្កើតថ្នាលឌីជីថលថ្មីនេះ មុនពេលដាក់ឱ្យដំណើរការនៅក្នុង ខែមិថុនា ឆ្នាំ ២០២៤ នេះ។ សូមទស្សនាវីដេអូសិក្ខាសាលា ដើម្បីស្វែងយល់បន្ថែម។

សូមអបអរសាទរដល់ កញ្ញា ស្រួ សោគន្ធិកា សហស្ថាបនិក និងនាយកប្រតិបត្តិនៃហ្វាម ហេរ៉ូ និងស្ថាបនិកអាជីវកម្មខ្នាតតូច និងធំចំនួនប្រាំពីរផ្សេងទៀត ក្នុងដំណើរបន្តជាមួយនឹងកម្មវិធីពន្លឿនអាជីវកម្មឆ្នៃ CNai Accelerator ដែលគាំទ្រដោយកម្មវិធីភាពជាដៃគូ កម្ពុជា អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED)។ កម្មវិធី CNai បានកំណត់ព្រឹត្តិការណ៍សំខាន់ដំបូងរបស់ខ្លួនជាមួយនឹងការធ្វើបទបង្ហាញអាជីវកម្ម។ បន្ទាប់ពីរយៈពេលពីរខែនៃការចូលរួមក្នុងសិក្ខាសាលាអាជីវកម្ម និងការរៀនអនុវត្ត ពួកគេបានបង្ហាញបេសកកម្ម និងផែនការអាជីវកម្មរបស់ខ្លួនសម្រាប់មតិកែលម្អទៅកាន់ក្រុមវាគ្មិនអ្នកជំនាញ។ ព្រឹត្តិការណ៍នេះបានជួយវាយតម្លៃការរួមចំណែកក្នុងអាជីវកម្មរបស់ពួកគេសម្រាប់ដំណាក់កាលបន្ទាប់។ សូមទស្សនាវីដេអូនេះ ដើម្បីស្តាប់ពីបទពិសោធន៍ និងអត្ថប្រយោជន៍ដែលបានទទួលពីអ្នកចូលរួមកម្មវិធី CNai។

ទោះបីជាប្រទេសកម្ពុជាជាប់ចំណាត់ថ្នាក់ក្នុងចំណោមប្រទេសអ្នកផលិតគ្រាប់ស្វាយចន្ទីកំពូលទាំងបីនៅទូទាំងពិភពលោក ប៉ុន្តែមានតែ ១០ភាគរយនៃគ្រាប់ស្វាយចន្ទីទាំងនោះប៉ុណ្ណោះ ត្រូវបានកែច្នៃនៅកម្ពុជា ក្រៅពីនេះ ត្រូវបានគេនាំចេញទៅកាន់បណ្តាលប្រទេសជិតខាង។ អូស្ត្រាលី តាមរយៈកម្មវិធី CAPRED កំពុងព្យាយាមជួយដល់ការសាកល្បងប្រើប្រាស់ម៉ាស៊ីនបកសំបកគ្រាប់ស្វាយចន្ទីថ្មី ដែលផលិតនៅកម្ពុជា ដើម្បីជួយបង្កើនសមត្ថភាពការកែច្នៃគ្រាប់ស្វាយចន្ទីក្នុងប្រទេសសម្រាប់អាជីវកម្មខ្នាតតូច។ ម៉ាស៊ីនទាំងនេះ មានតម្លៃសមរម្យ ទំហំតូច មិនត្រូវការទីតាំងធំ និងងាយស្រួលប្រើប្រាស់។ ម៉ាស៊ីននេះជួយពង្រឹងគុណភាព និងសមត្ថភាពកែច្នៃ មានសុវត្ថិភាពសម្រាប់កម្មករ និងជួយបង្កើនប្រាក់ចំណូលឱ្យមានភាពប្រសើរឡើងជាងមុន។ អ្នកប្រើប្រាស់ម៉ាស៊ីននេះដំបូងម្នាក់ ឈ្មោះ ឌុក ភិរម្យ បានរៀបរាប់ថា ម៉ាស៊ីននេះ អាចបង្កើនទិន្នផលនៃការកែច្នៃគ្រាប់ស្វាយចន្ទីបានទ្វេដង គឺកើនពី ៥០ ទៅ ១០០ គីឡូក្រាមក្នុងមួយថ្ងៃ។ កាលពីពេលថ្មីៗនេះ ភារធារី Pablo Kang បានធ្វើទស្សនកិច្ចទៅកាន់ខេត្តសៀមរាប ដើម្បីពិនិត្យមើលពីបច្ចេកវិទ្យាថ្មីដែលកំពុងដាក់ដំណើរការ ដែលជាផ្នែកមួយនៃកិច្ចខិតខំប្រឹងប្រែងរបស់អូស្ត្រាលីក្នុងការធ្វើអោយវិស័យគ្រាប់ស្វាយចន្ទីកាន់តែប្រសើរឡើង។ សូមទស្សនាវីដេអូនេះដើម្បីស្វែងយល់បន្ថែម។

តាមរយៈកម្មវិធីភាពជាដៃគូ អូស្ត្រាលី កម្ពុជា សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED) យើងមានមោទនភាពក្នុងការក្លាយជាអ្នកចូលរួមឧបត្ថម្ភក្នុងកម្មវិធីសម្ពោធជាផ្លួវការ ផែនការយុទ្ធសាស្រ្តនារីរតនៈទី៦ ឆ្នាំ ២០២៤-២០២៨ កាលពីពេលថ្មីៗកន្លងទៅនេះ។ ផែនការយុទ្ធសាស្រ្តនេះ មានគោលបំណងលើកកម្ពស់សមភាពយេនឌ័រ និងបរិយាបន្ននៅប្រទេសកម្ពុជា តាមរយៈយុទ្ធសាស្ត្រអាទិភាពចំនួនប្រាំមួយ រួមមាន ការបង្កើនភាពអង់អាចផ្នែកសេដ្ឋកិច្ចរបស់ស្ត្រី ស្ត្រី និងការប្រែប្រួលអាកាសធាតុ រាប់ចាប់ពីការបន្សាំទៅនឹងអាកាសធាតុ រហូតដល់ភាពធន់របស់សហគមន៍។ ពិធីសម្ពោធនេះប្រព្រឹត្តទៅក្រោមអធិបតីភាព លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី និងលោកស្រី Amber Cernovs ពីខាងស្ថានទូតអូស្រ្តាលី ដោយមានអ្នកចូលរួមប្រមាណជាង ៥០០នាក់។ សូមទស្សនាវីដេអូសង្ខេប ដើម្បីស្វែងយល់បន្ថែម។

អូស្ត្រាលី តាមរយៈកម្មវិធីភាពជាដៃគូ កម្ពុជា អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED) បានឧបត្ថម្ភម្ចាស់សិប្បកម្មកែច្នៃគ្រាប់ស្វាយចន្ទីកម្ពុជាចំនួន ១០ នាក់ ដើម្បីចូលរួមក្នុងសន្និសីទគ្រាប់ស្វាយចន្ទីពិភពលោកឆ្នាំ ២០២៤ ដែលកម្ពុជាធ្វើជាម្ចាស់ផ្ទះ។ សន្និសីទដែលបានធ្វើឡើងនៅថ្ងៃទី ១-៣ ខែកុម្ភៈ បានអនុញ្ញាតឱ្យក្រុមហ៊ុនខ្នាតតូច និងមធ្យមរបស់កម្ពុជា អាចភ្ជាប់ទំនាក់ទំនងជាមួយអ្នកកែច្នៃគ្រាប់ស្វាយចន្ធីរអន្តរជាតិ វិនិយោគិន និងអ្នកបញ្ជាទិញនានា ហើយទទួលបាននូវការយល់ដឹងស៊ីជម្រៅអំពីគំរូអាជីវកម្ម និងការអនុវត្តថ្មីៗ ក្នុងគោលដៅពង្រឹងតម្លៃខ្សែសង្វាក់ផ្គត់ផ្គង់គ្រាប់ស្វាយចន្ទី។ សូមទសន្សាវីដេអូសង្ខេបនៃសន្និសីទ ដើម្បីស្វែងយល់បន្ថែម។

លទ្ធភាពទទួលបានទឹកស្អាតប្រើប្រាស់ជួយកាត់បន្ថយភាពក្រីក្រ គាំទ្រដល់កំណើនសេដ្ឋកិច្ច និងនិរន្តរភាពបរិស្ថាន។ វាក៏អាចជួយផ្លាស់ប្តូរជីវភាពរស់នៅផងដែរ។ សម្រាប់លោក ណារុន ដែលជាឪពុកមានពិការភាពភ្នែកម្នាក់ក្នុងប្រទេសកម្ពុជា លទ្ធភាពទទួលបានទឹកស្អាតប្រើប្រាស់ បានជួយអោយជីវភាពគ្រួសាររបស់គាត់កាន់តែប្រសើរឡើង។ តាមរយៈការទទួលបានទឹកស្អាតប្រើប្រាស់ ដែលផ្តល់មូលនិធិដោយប្រទេសអូស្ត្រាលី ពេលនេះគ្រួសាររបស់ លោក ណារុន អាចរៀបចំការងារផ្ទះរបស់ពួកគេប្រកបដោយប្រសិទ្ធភាព ហើយប្រពន្ធរបស់គាត់មានពេលវេលាបន្ថែម ដើម្បីជួយរកប្រាក់ចំណូលសម្រាប់គ្រួសាររបស់ ពួកគេ។ លោក ណារុន មើលថែទាំកូន ចម្អិនអាហារ និងធ្វើការងារផ្ទះផ្សេងៗ។ ប្រពន្ធរបស់គាត់ ជាតួអង្គសំខាន់នៃភាពជោគជ័យរបស់គ្រួសារ គាត់លក់ដូរចំណីអាហារ និងចិញ្ចឹមសត្វ។ ពីមុន កង្វះទឹកស្អាតដែលអាចទុកចិត្តបាន បានធ្វើឱ្យការងារទាំងនេះមានការលំបាកខ្លាំង។ ទិវាទឹកពិភពលោកនេះ ប្រារព្ធឡើងដើម្បីអបអរអត្ថប្រយោជន៍ដែលប្រជាជនទទួលបានពីការមានទឹកស្អាតប្រើប្រាស់។ សូមទស្សនាវីដេអូនេះ ដើម្បីមើលពីរបៀបដែលជំនួយរបស់អូស្ត្រាលីកំពុងផ្លាស់ប្តូវជីវភាពគ្រួសារ ដូចជាគ្រួសារ ណារុន ជាដើម ហើយស្វែងយល់ពីរបៀបដែលអ្នកអាចរួមចំណែកដល់ពិភពលោកដែលមានទឹកស្អាតសម្រាប់ទាំងអស់គ្នា។ កម្មវិធីភាពជាដៃគូ កម្ពុជា អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED) កំពុងបន្តគាំទ្រដល់ការទទួលបានទឹកស្អាតប្រើប្រាស់នៅទីជនបទក្នុងប្រទេសកម្ពុជា។

ថ្ងៃនេះយើងធ្វើការឆ្លុះបញ្ចាំងពីប្រធានបទមួយរបស់អង្គការសហប្រជាជាតិ ការវិនិយោគលើស្ត្រី៖ បង្កើនល្បឿនវឌ្ឍនភាព។ អូស្ត្រាលីគាំទ្រការវិនិយោគលើស្ត្រី បណ្តាអង្គការសិទ្ធិស្ត្រី និងអ្នកបង្កើតការផ្លាស់ប្តូរស្ត្រី ដើម្បីបញ្ឈប់វិសមភាព។ ដើម្បីអបអរទិវានារីអន្តរជាតិ យើងសូមនាំអ្នកអោយជួបជាមួយ លោកជំទាវ ឧកញ៉ា កែវ មុំ ស្ថាបនិកក្រុមហ៊ុន លីលី ហ្វូត ខូ អិល ធី ឌី ដែលបានដឹកនាំសហគ្រាសនំស្រួយលីលី ពង្រីកអាជីវកម្មពីខ្នាតតូចរហូតក្លាយជាក្រុមហ៊ុនផលិតអាហារសម្រន់ឈានមុខគេ។ ចាប់តាំងពីឆ្នាំ ២០០២ មក លោកជំទាវ ឧកញ៉ា កែវ មុំ បានពង្រីកសហគ្រាសនំស្រួយលីលី ពីចំនួនបុគ្គលិកប្រមាណ ២០ រហូតដល់ ៥០០ នាក់ ហើយបច្ចុប្បន្ននេះបាននាំចេញផលិតផលទៅកាន់ជាង ១០ ប្រទេស។ ដំណើរឆ្ពោះទៅកាន់ភាពជោគជ័យរបស់លោកជំទាវឧកញ៉ា ជាឧទាហរណ៍បង្ហាញពីឥទ្ធិពលនៃការវិនិយោគលើស្ត្រី។ អូស្ត្រាលីប្តេជ្ញាជំរុញការពង្រឹងសិទ្ធិអំណាចសេដ្ឋកិច្ចរបស់ស្ត្រី និងជំរុញកំណើនសេដ្ឋកិច្ចប្រកបដោយបរិយាបន្ននៅកម្ពុជា។ តាមរយៈកម្មវិធីអភិវឌ្ឍន៍សេដ្ឋកិច្ចដ៏សំខាន់របស់យើង កម្មវិធីភាពជាដៃគូ កម្ពុជា អូស្រ្តាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED) យើងបានរៀបចំដំណើរទស្សនកិច្ចសិក្សាទៅកាន់ប្រទេសអូស្ត្រាលីសម្រាប់សហគ្រិនស្ត្រីកម្ពុជាចំនួន ១៤ នាក់ រួមទាំង លោកជំទាវឧកញ៉ា កែវ មុំ ផងដែរ។ ដំណើរទស្សនកិច្ចនេះ បានផ្តល់ឪកាសដល់ពួកគាត់ក្នុងការចែករំលែកចំណេះដឹង និងបង្កើតបណ្តាញទំនាក់ទំនងជាមួយបណ្តាអ្នកធុរកិច្ចអូស្ត្រាលី មន្ត្រីរដ្ឋាភិបាលជាន់ខ្ពស់ និង សមាគមដែលដឹកនាំដោយស្ត្រី។ សូមរង់ចាំតាមដានសាច់រឿង និងបទពិសោធន៍ឆ្នើមរបស់ស្ត្រីដែលយើងបានវិនិយោគបន្ថែមទៀត។

អូស្ត្រាលីជួយពង្រឹងសមត្ថភាពរបស់វិស្វករទឹកវ័យក្មេងដើម្បីទទួលបានទឹកស្អាតប្រកបដោយនិរន្តរភាព កម្មវិធីអភិវឌ្ឍន៍សេដ្ឋកិច្ចដ៏សំខាន់មួយរបស់អូស្ត្រាលី កម្មវិធីភាពជាដៃគូ កម្ពុជា អូស្ត្រាលី សម្រាប់ការអភិវឌ្ឍសេដ្ឋកិច្ចប្រកបដោយភាពធន់ (CAPRED) បានរៀបចំដំណើរទស្សនកិច្ចសិក្សាសម្រាប់និសិត្ស និងសាស្ត្រាចារ្យផ្នែកវិស្វកម្មទឹក ទៅកាន់ស្ថានីយ៍ផលិតទឹកស្អាតមួយក្នុងខេត្តកំពង់ចាម។ ដំណើរទស្សនកិច្ចនេះ ជួយឱ្យនិស្សិតនិងសាស្ត្រាចារ្យផ្នែកវិស្វកម្មទឹក និងបរិស្ថាន មកពីវិទ្យាស្ថានបច្ចេកវិទ្យាកម្ពុជាចំនួន ៣០ នាក់ ស្វែងយល់បន្ថែមអំពីខ្សែសង្វាក់នៃការផ្គត់ផ្គង់ទឹកស្អាត។ និស្សិតនិងសាស្ត្រាចារ្យដែលបានចុះកម្មសិក្សា បានទទួលចំណេះដឹងកាន់តែច្បាស់អំពីបញ្ហានានាទាក់ទងនឹង ផ្នែកច្បាប់ បច្ចេកទេស និងហិរញ្ញវត្ថុក្នុងការផ្គត់ផ្គង់ទឹកស្អាត។ ពួកគាត់ក៏បានពិភាក្សាគ្នាផងដែរ អំពីរបៀបនៃការផ្គត់ផ្គង់ទឹកស្អាតប្រទាក់ក្រឡាគ្នាជាមួយនឹងបញ្ហាសំខាន់ៗ ដូចជា សមភាពយេនឌ័រ ពិការភាព បរិយាបន្នសង្គម និងភាពធន់នឹងបម្រែបម្រួលអាកាសធាតុ ដើម្បីផ្តល់សិទ្ធអំណាចដល់សហគមន៍។ 🎥 សូមទស្សនាវីដេអូនេះ ដើម្បីស្វែងយល់ពីរបៀបដែលអូស្ត្រាលីកំពុងជួយពង្រឹងសមត្ថភាពរបស់វិស្វករទឹកវ័យក្មេងដើម្បីអនាគតវិស័យទឹកស្អាតនៅប្រទេសកម្ពុជា។